Patay ang usa ka negosyante human gipusil sa wala mailang nga suspetsado, samtang natulog sulod sa iyang pinuy-anan bandang alas 1:15 sa kadlawon kagahapon Oktobre 22, 2025 sa Purok 1-A, barangay Batangan dakbayan sa Valencia.
Nailhan ang biktima nga si Intelegando Niere Y Balase, 65-anyos, minyo residente sa maong dapit kinsa nakahiagom ug samad pinusilan sa ulo hinungdan sa hinanaling kamatayon.
Sa pakighinabi sa Juander Radyo Malaybalay kang Valencia City Police Office Chief Police Lieutenant Colonel Bryan Panganiban gilantaw nga anggulo mao ang away sa yuta nga misangpot sa pagpamusil base sa mga testimonya sa asawa sa biktma.
Gitug-an sa asawa nga si Ninian Balase nga sa wala pa nahitabo ang pagpamusil aduna nay nagbahad sa kinabuhi sa iyang bana, dihang gisita samtang nagkural sa giawayan nga yuta ug wala usab niya maklaro ang dagway sa suspetsado gumikan sa kangitngit niadtong higayona nga daling misibat usab human sa krimen.
Sa karon padayon ang makuting imbestigasyon sa kapolisan sa maong pagpamusil samtang giawhag ang publiko nga pabiling magbinantayon ug kung adunay kadudahang lihok sa tawo o hulga sa kinabuhi gilayon itaho sa ilang buhatan alang sa tukmang aksyon.
via: Valencia City PNP
