Gisuspinde sa 90 ka adlaw ang lisensya sa usa ka pick-up driver nga nakuha sa video samtang gikulata ang usa ka tigulang nga driver sa pampasaherong bus sa Silang, Cavite kabag-ohay lang.
Ang maong desisyon gibuhat sa Department of Transportation (DOTr) isip pagtuman sa mando ni Presidente Ferdinand Marcos Jr. nga panubagon ang mga abusadong motorista sa kalsada.
Base sa imbestigasyon sa Silang Municipal Police Station, nagkabangga ang Toyota Hilux nga gimaneho ni Arny Jose Montes ug ang usa ka Public Utility Bus (PUB). Human sa insidente, nakuhanan og video si Montes nga gikulata ang tigulang nga bus driver.
Tungod sa panghitabo, gipatawag sa Land Transportation Office (LTO) ang maong driver aron ibutyag ug ipakita kung ngano nga dili siya angay kasuhan sa Reckless Driving ug dili angay kanselahon ang iyang lisensya.
Matod ni Acting Transportation Secretary Giovanni Lopez, dili pasagdan sa DOTr ang mga motoristang abusado ug bastos sa dalan tungod kay kini makapahasol ug makatag og kasamok sa uban.
Photo courtesy: Department of Transportation (DOTr)
