Giimbestigahan na karon sa mga otoridad sa Italy ang usa ka pagbusikad nga nahitabo sa gawas sa balay sa iladong investigative journalist nga si Sigfrido Ranucci, nga nailhan sa iyang mga sensitibong report ug imbestigasyon batok sa korapsyon.
Base sa inisyal nga impormasyon, usa ka klase sa bomba ang gibutang sa atubangan sa gate sa balay ni Ranucci nga nahimutang sa Campo Ascolano. Nahitabo ang pagbusikad mga 20 minutos human sa pag-abot ni Ranucci sa ilang balay.
Duha ka sakyanan ang nadaot sa maong panghitabo, nga panag-iya ni Ranucci ug sa iyang anak nga babaye. Si Ranucci ilalom na sa police protection sulod sa pipila ka tuig tungod sa mga hulga sa iyang kinabuhi nga may kalabotan sa iyang trabaho isip usa ka journalist.
Gikondena ni Italian Prime Minister Giorgia Meloni ang maong insidente ug gimandoan ang mga otoridad nga pahugtan ang imbestigasyon aron masuta kinsa ang responsable sa pagpamutang sa bomba ug unsay motibo niini.
Gilauman karon nga mopadayon ang mas lawom nga imbestigasyon samtang nagpadayon ang mga otoridad sa pagtipon og ebidensya ug testimonya sa palibot sa hitabo.
Photo credits to: CNN
