Daling nagpahigayon ug rescue operation ang mga militar sa Alaska human nga mikusokuso ang Bagyong Halong niadtong miaging semana nga nagresulta sa pagkaguba sa mga panimalay ug pagbakwit sa gatusan nga gikan sa mga baryo sa habagatan-kasadpang baybayon sa estado.
Matod pa ni incident commander Mark Roberts base sa iyang pamahayag niadtong Oktubre 15 nga ang duha ka mga baryo ang nanginahanglan na ug pagbakwit tungod sa grabeng epekto sa bagyo.
Nakatala ug rekord ang maong bagyo tungod sa kakusog niini, diin mibanlas sa mga balay ug miresulta usab sa grabeng kusog nga baha ug ulan ingon man nagbilin sa 1,500 ka mga residente sa temporaryong mga puy-anan. Gani, gikumpirma usab nga usa ang namatay ug duha ang nagpabiling missing.
Tungod sa maong insidente, nakaagni kini sa attensyon sa administrasyon ni Trump ug mihatag ug tabang particularmente sa mga Lumad sa mga baryo.
Sa karun padayon pa ang search and rescue operation sa mga otoridad alang sa pagpangita sa mga namissing. Gi-awhag usab ang lokal nga mga residente nga mag amping ug musunod sa mga protocol alang sa ilang kaluwasan.
Photo courtesy to:Global News
