Mideklara ang Los Angeles County og state of emergency, agig tubag sa nagpadayon nga pagsumpo sa gobyerno sa mga ilegal nga imigrante sa United States. Gisugyot kini nila County Supervisors Lindsey P. Horvath ug Janice Hahn, ug kini gi-aprobahan sa botohan uban ang resulta nga 4-1.
Ang deklarasyon naghatag gahum sa mga lokal nga gobyerno sa paghatag kahupayan sa mga residente nga apektado, labi na sa pinansyal, pinaagi sa mga operasyon sa Immigration and Customs Enforcement kon (ICE).
Gibana-banang kapin sa 3 milyon ka mga immigrante ang nagpuyo sa Los Angeles, ug ang agresibong lihok sa ICE nagdala og dakong kahadlok sa komunidad. Tungod niini, mikunhod ang mga mosulod sa trabaho, naapektuhan ang dagan sa ekonomiya, ug nabalda ang mga pampublikong serbisyo sama sa mga tunghaan, ospital, ug simbahan.
Samtang, gisiguro ni County Supervisor Lindsey P. Horvath nga magpadayon ang suporta sa lokal nga panggamhanan, alang sa mga immigrante hangtod nga mawala ang hulga sa ilang kaluwasan ug magpabiling epektibo ang deklarasyon hangtod kini pormal nga bawi-on sa konseho.
Photo courtesy to:Newsweek
