Pormal nang nanumpa karong adlawa si Retired General Rodolfo Azurin Jr. isip bag-ong Special Adviser sa Independent Commission for Infrastructure (ICI) human mohulip kang Baguio City Mayor Benjamin Magalong, nga mi-resign sa maong posisyon human sa halos duha ka semana sa serbisyo.
Sa iyang pamahayag pagkahuman sa panumpa, giingon ni Azurin nga iyang ibutyag ang kamatuoran dili pinaagi sa kasuko, kundi pinaagi sa hustisya. Iyang gipasiugda nga tuyo sa iyang tahas ang pagpanalipod sa interes sa katawhan ug pagbalik sa ilang pagsalig sa mga proyekto sa gobyerno pinaagi sa tinud-anay nga imbestigasyon ug pagpanubag sa mga responsable.
Gibutyag usab ni Azurin nga karong semanaha, i-validate na sa ICI ang 421 ka mga “ghost” flood control projects nga gisumite sa Department of Public Works and Highways (DPWH). Ang mga technical field engineers ang manguna sa pagdokumento niini.
Base sa unang imbestigasyon sa ICI, gikan sa tuig 2016 hangtod 2024, anaa sa: 261 ka proyekto sa Luzon, 109 sa Visayas, ug 51 sa Mindanao.
Gipasabot pa ni Azurin nga human sa 3 hangtod 4 ka semana, mohimo ang ICI og rekomendasyon nga 15 hangtod 20 ka kaso nga isumite sa Office of the Ombudsman batok sa mga posibleng nalambigit sa anomalya.
PHOTO: PHILIPPINE NEWS AGENCY
