Giklaro sa Philippine Institute of Volcanology and Seismology (Phivolcs) nga walay si bisan kinsang tawo, apil na ang mga mananap, ang makatag-an kon kanus-a moigo ang linog.
Matod ni Phivolcs Director Teresito Bacolcol nga sayop ang pagpatuo-tuo bahin sa linog atol sa usa ka news media forum. Matod sa opisyal sa Phivolcs, bisan ang mga manghuhula dili makahimo sa pag-ingon kon kanus-a mahitabo ang linog tungod kay wala kini siyentipikanhong basihan.
Gihisgotan usab ni Bacolcol ang dugay na nga pagtuo nga ang mga mananap makabatyag o makatagna sa linog sa dili pa kini moabot. Matod niya, bisan tuod nga ang mga mananap mahimong mo-reak og lahi kon makabatyag og kurog (vibration) o tingog sa dili pa ang linog, dili kini mahimong i-sumpay sa panagna (prediction). Gipugos sa opisyal nga ang mga behaviour sa mga mananap walay siyentipikanhong koneksiyon sa seismic activity o linog.
Kalabot niini, giawhag sa hepe sa Phivolcs ang publiko nga mosalig lamang sa official advisories gikan sa ahensiya ug likayan ang pagpaambit sa mga dili beripikadong impormasyon online tungod kay makamugna ra kini og kalisang (panic).
Sa laing bahin, giingon usab ni Bacolcol nga posibleng moabot pa og 400 ka tuig sa dili pa moigo og usab ang susamang kakusog nga linog sa northern Cebu. Base sa historical ug geological data, matod sa opisyal, moabot og gatusan ka tuig sa dili pa moigo ang laing kusog nga linog nga susama sa miigo na sa amihanang Sugbo.
Samtang sa Central ug Southern Cebu, wala pay igong datos, apan nagpadayon ang pagtuon niini diin adunay potensyal nga active fault sa central part sa Cebu.
Photo courtesy: PHIVOLCS
