Nagpagawas og tsunami warning ang Indonesia’s Meteorology, Climatology and Geophysics Agency human sa kusog nga linog nga Magnitude 7.6 nga miigo duol sa baybayon sa Melonguane, North Sulawesi, sa mga alas-8:43 sa buntag (Jakarta time) kagahapon, Oktubre 10, 2025.
Sumala sa Indonesia’s Meteorology, Climatology and Geophysics Agency ang epicenter sa linog adunay giladmon nga 56 kilometro ilawom sa yuta. Human sa pag-igo sa linog, dali silang nagpahibalo sa posible nga tsunami alang sa North Sulawesi ug mga kasikbit nga lugar sa Papua, Indonesia.
Gipahayag usab sa maong ahensya nga ang impormasyon base sa ilang nadawat nga datos, ug kini posible pang mausab samtang nagapadayon ang mas lawom nga imbestigasyon ug ebalwasyon sa nahitabong kalihokan. Gipahimangnoan ang publiko nga magpabiling alerto ug maghulat sa mga opisyal nga update.
Gipahimangnoan sa gobiyerno ang mga residente nga nagpuyo sa mga baybayon nga magpabiling alerto ug andam, samtang nagpadayon ang pagmando sa mga opisyal nga abiso gikan sa mga otoridad.
Kini nga panawagan gihimo taliwala sa nagpadayon nga monitoring sa posibleng pagtaas sa lebel sa tubig-dagat ug sa mga aftershock human sa kusog nga linog nga miigo sa rehiyon. Gi-awhag usab ang tanan nga sundon ang mga pahimangno ug direktiba aron malikayan ang katalagman ug masiguro ang ilang kaluwasan.
Sama sa Pilipinas, nahimutang usab ang Indonesia sulod sa gitawag nga Pacific Ring of Fire —kini usa ka rehiyon nga kasagarang makasinati og mga linog ug pagbuto sa mga bulkan.
Kini tungod sa aktibong panagbangi o banggaan sa mga tectonic plates nga naglihok ubos sa kalibutan. Tungod niini, delikado ug kanunay nga gimonitor ang mga kalihokan sa yuta sa maong rehiyon, ilabi na sa mga lugar nga daplin sa dagat ug duol sa mga aktibong bulkan.
Photo courtesy to:DW
