Nakaalerto ang tibuok pwersa sa Philippine National Police (PNP) alang sa lihok protesta karong adlaw nga Biyernes. Sa usa ka pahayag, si Acting PNP Chief PLtGen. Jose Melencio Nartatez Jr., nipasalig nga kini aron mapahugtan ang seguridad sa mga kalihukan nga ipahigayon sugod karong adlawa.
Gihimug-atan ni Nartatez nga andam na ang tanang police commanders sa Metro Manila ug uban pang lugar nga posibleng mahitabo ang maong mga protesta.
Kabahin sa pagpangandam sa Pambansang Pulisya ang pagsiguro nga walay mahitabong kagubot sa maong mga kalihukan ug pagsiguro nga ang maong mga protesta dili mahisama sa kagubot nga nahitabo sa Manila niadtong Septiyembre 21.
Samtang, bisan og walay nakitang hulga karon ang PNP sa umaabot nga mga kalihukan, gitataw ni Nartatez nga padayon nilang gitutokan ang kahimtang karon alang sa dinaliang tubag ug mga lakang nga ilang himuon kung adunay mga personalidad nga nagtinguha nga makalapas sa mga balaod.
Sa pagkakaron, gilatag na ang mga plano sa Pambansang Pulisya alang niining dakong panagtapok ug gimandoan ang mga kumander nga padayon nga maghimog mga kausaban depende sa sitwasyon.
Photo Courtesy to:Philstar.com
