Gitigom sa mga local government units (LGUs) sa Caraga Region ang ilang tagsa-tagsa ka Disaster Risk Reduction and Management Councils (DRRMCs) ug gipatuman ang halapad nga precautionary measures nunot sa magnitude 7.4 nga linog nga miigo sa kadaghanang bahin sa Mindanao Biyernes sa buntag.
Sa Dinagat Islands, si OIC-Governor Geraldine “Jade” Ecleo nipagawas dayon og executive order alang sa preemptive measures, lakip na ang temporaryong pagsuspenso sa mga biyahe sa dagat ug pagpatuman sa preemptive evacuation protocols sa mga coastal barangays.
Gipatuman usab sa Coast Guard Station sa probinsya ang pagsuspenso sa pagbiyahe, bisan kung gikansela na sa Philippine Institute of Volcanology and Seismology (PHIVOLCS) ang tsunami warning nga gipagawas sayo sa buntag.
Gimando usab ni Surigao del Norte Governor Robert Lyndon Barbers ang temporaryong pagsuspenso sa klase sa tanang lebel sa pampubliko ug pribadong tunghaan, ingon man ang pagsuspenso sa trabaho sa mga buhatan sa gobyerno.
Sa Surigao del Sur, gimandoan ni Gobernador Johnny Pimentel ang tanang mayor sa pagsiguro sa dinaliang pagbakwit sa mga komunidad sa kabaybayonan ngadto sa mas taas nga dapit. Gimando usab ni Pimentel ang temporaryong pagsuspenso sa trabaho ug klase sa tanang lebel.
Sa Agusan del Sur, gimando ni Gobernador Santiago Cane Jr. ang pagsuspenso sa klase sa tanang publiko ug pribadong tunghaan. Gimando usab niini ang mandatory inspection ug assessment sa tanang mga edipisyo sa Provincial Engineering Office, ingon nga gisuspinde ang trabaho sa publiko ug pribado nga mga opisina aron mahatagan ang dalan alang sa mga inspeksyon sa bilding.
Sa Butuan City, ang Department of Public Works and Highways sa Caraga Region (DPWH-13) daling gisusi ang Magsaysay Bridge, usa ka dakong pasilidad sa imprastraktura sa dakbayan.
Sa ilang situational report, ang DPWH-13 nagkanayon nga ang tulay nasuta nga luwas ug maagian sa gaan nga mga sakyanan.
Sa kasamtanagan, ang mga pagsusi sa kadaot ug uban pang epekto sa kusog nga linog nagpadayon pa sa lainlaing mga LGU.
Source: Philippine News Agency
