Mangilabot na usab ang Prime Minister sa Qatar ug usa ka delegasyon gikan sa Turkey sa ikatulo nga adlaw sa peace talks tali sa mga negotiator sa Hamas ug Israel, kansang tumong ang pagtapos na sa gubat tali sa duha ka partido kagahapong adlawa, Oktubre 8.
Kini kabahin sa indirect negotiations tali sa Israel ug Hamas nga gipahigayon didto sa Red Sea resort town sa Sharm El-Sheikh, kalabot sa 20-point plan nga gisugyot ni US President Donald Trump.
Niadtong Martes, giingon ni Trump nga moapil usab ang mga US negotiators sa panaghisgotay. Gipahibalo usab sa US President nga adunay posibilidad nga makab-ot ang kalinaw sa Middle East ug ang tinguha nga daling mapagawas na ang tanang nahibiling mga bihag sa Hamas sa Gaza.
Matud ni Trump, buhaton sa Amerika ang tanan aron masiguro nga mosunod ang matag usa sa kasabutan, kung magkasabot na ang Hamas ug Israel sa usa ka ceasefire.
Photo courtesy: Al Jazeera
