Gihukmang guilty sa International Criminal Court (ICC) si Ali Muhammad Ali Abd-Al-Rahman, mas nailhan nga Ali Kushayb, sa 27 ka kaso sa war crimes ug crimes against humanity kalabot sa kaylap nga kabangis sa Darfur, Sudan gikan sa Agosto 2003 hangtod Abril 2004.
Si Kushayb kanhi taas nga opisyal sa Janjaweed, usa ka armadong grupo nga gisuportahan sa gobyerno sa Sudan nga nailhang nalambigit sa brutal nga kampanya batok sa mga rebelde nga grupo sa Darfur. Nagsugod ang gubat niadtong 2003 sa dihang mirebelde ang mga ethnic African nga grupo batok sa Arab-dominated nga gobyerno sa Khartoum. Isip tubag, gilunsad sa gobyerno ang scorched-earth campaign nga naglakip sa aerial bombings ug pag-atake sa Janjaweed sa mga komunidad.
Matod sa ICC, si Kushayb dili lang nagmando sa mga pag-atake kondili personal nga miapil sa mga pagpatay, pagpanglugos, ug torture. Usa sa mga testigo miingon nga gimandoan ni Kushayb ang iyang mga sakop nga “isubli ang pag-atake” aron maseguro nga walay makaluwwas.
Apil sa mga krimen nga gipasaka ang murder, rape, torture, persecution, ug forcible transfer of population.
Photo courtesy: International Criminal Court – ICC
