Giangkon sa Department of Agriculture (DA) nga dako og epekto ang kakuwang sa drying facilities sa nasud sa padayong pag-us-os sa presyo sa bugas, ilabi na panahon sa ting-ulan.
Atol sa pagdungog sa House Committee on Agriculture, gipangutana ni ACT Teachers Party-list Rep. Antonio Tinio ang DA kon nganong mous-os ang presyo sa bugas panahon sa baha o bagyo, inay motaas.
Gipasabot ni Agriculture Secretary Francisco Tiu Laurel Jr., nga “normal” ang pagminus sa presyo sa panahon sa ting-uwan tungod kay dili pa andam ang nasud sa pagproseso sa basa nga bugas.
Iyang gitumbok nga ubos pa sa 11 porsiyento ang drying capacity sa nasod sa kinatibuk-ang ani sa humay, diin kadaghanan niini gipauga pa sa dalan o sa covered courts.
Dugang pa, ang kusog nga pag-ulan, baha, ug grabeng kainit human sa ulan makaapekto usab sa kalidad sa bugas — hinungdan nga ang mga rice miller mosalikway niini o mopalit niini sa mas ubos nga presyo.
Base sa report sa DA gikan Setyembre 29 hangtod Oktubre 3, 2025, ang presyo sa presko nga humay anaa sa taliwala sa ₱7.50 ngadto sa ₱18.20 kada kilo, samtang ang dry palay anaa sa taliwala sa ₱11.09 ngadto sa ₱25 kada kilo, nga adunay average nga presyo nga ₱23 kada kilo.
Photo Courtesy to:PNA
