Ngpadayon gihingusgan sa panggamhanang Lokal sa New Bataan DDO, ang pagtutok sa serbisyong medikal. Kini ang gibutyag sa Inahan sa Lungsod sa pakighinabi sa Juander Radyo Nabunturan News Team ni Mayor Atty. Bianca Cualing Brua sa gipahigayon nga press conference didto mismo sa ilang municipal hall kagahapong adlawa, Oktubre 7, 2025,
Tumong sa maong pakigpulong mao ang paghatag og kasayuran sa mga lakang ug programa nga ipatuman sa lungsod. Usa sa mga isyung gihatagan og gibug-aton niya mao ang kakulang sa ospital sa ilang lugar.
Matod niya hangtod karon wala pay ospital sa New Bataan, hinungdan nga kung adunay seryosong kaso sa pasyente, kinahanglan pa silang i-transfer sa silingan nga mga lungsod aron mahatagan og tukmang pag-atiman.
Bisan pa niini, gibutyag pa niya nga adunay plano nga magtukod og kaugalingong ospital ang lungsod sa umaabot. Apan sa pagkakaron, wala pa kini’y pondo o klarong petsa kung kanus-a kini masugdan.
Gipasalig niya nga bisan wala pay ospital, nagapadayon ang serbisyo sa mga barangay health stations ug mga health workers nga andam motabang sa tanang oras.
Sa kataposan, gipasabot sa mayor nga nagapadayon ang paningkamot sa lokal nga kagamhanan aron mapalambo ang sektor sa kahimsog sa lungsod ug masiguro nga makab-ot sa katawhan ang hustong serbisyo medikal.
