Nagpabiling hapsay ug walay bagyo sulod sa Philippine Area of Responsibility (PAR), apan adunay usa ka Severe Tropical Storm nga hugtanong gimonitor karon sa DOST PAGASA, Oktubre 06, 2025 gawas sa PAR, ug lauman nga adunay kausaban niini sulod sa 24 oras.
Gilaumanauman usab nga makasinati sa gihapon og posibleng pag ulan ug pagdahili sa yuta gumikan sa pagbalik sa Intertropical Covergence Zone (ITCZ) nga nakaapekto sa ubang bahin nasud hilabi na sa Probinsiya sa Davao del Norte.
Sumala sa ulahing datos nga gipagawas sa PDRRMO Davao del Norte, normal pa ang lebel sa tubig sa Menzi Bridge-Santo Tomas, Magupising Bridge-Tagum River, Pagsabangan Bridge, Libuganon River ug Saug Dam.
Samtang ang kahimtang sa kadagatan anaa sa 0.6 hangtod 1.5 meters ang pagbalod. Kabahin sa klima, natala ang minimum temperature nga 23.4°C alas 6:30 sa buntag ug maximum nga 32.2°C alas 2:00 sa hapon. Ang adlaw usab musubang alas 5:46 sa buntag ug mosalop kini alas 5:42 sa hapon.
Nagpahimangno ang mga otoridad sa tanan nga mag-amping kanunay tungod sa posibleng pag-ulan. Gikinahanglan nga magbantay sa mga kalikupan nga risgo sama sa baha, landslides, ug uban pang mga disgrasya nga dala sa posibleng nga pag-ulan. Siguroha nga magpabilin sa luwas nga lugar ug mag-andam sa mga kinahanglanon aron malikayan ang peligro.
PHOTO- DOST PAGASA
