Nagpadayon ang epekto sa Easterlies sa tibuok nasud. Sumala sa taho gikan sa PAGASA, ang Dakbayan ug Lalawigan sa Surigao del Norte ug Dinagat Islands makasinati og mapanganuron nga kalangitan inubanan sa katag-katag nga pag-ulan, kilat ug dalugdog tungod sa Easterlies.
Gipasidaan usab nga posible ang pagbaha o pagdahili sa yuta ilabina sa mga lugar nga makasinati og kusog nga pagbundak sa ulan, busa ginahangyo ang mga residente sa tagsa-tagsa ka barangay nga magmatngon ug mag-andam sa posibleng epekto niini.
Samtang, hinay ngadto sa kasarangan ang hangin nga magagikan sa amihan-silangan padulong sa amihan nga direksyon, ug hapsay ngadto sa kasarangan ang balud sa kadagatan.
