Gipahibalo sa mga otoridad sa panahon nga padayon nga makaapekto ang Tropical Depression “ADA” sa Davao Region, nga magdala ug madag-umon nga kalangitan inubanan sa katag-katag nga pag-ulan, kilat ug pagpanalugdog.
Sa pinakabag-ong datos, ang sentro sa TD “ADA” naobserbahan 570 kilometro sa sidlakan sa Hinatuan, Surigao del Sur, ug nagalihok paingon sa west-northwest nga direksyon. Tungod niini, posible ang pagbaha ug pagdahili sa yuta ilabi na sa mga lugar nga makasinati ug kusog nga ulan.
Gilauman usab nga ang sidlakang bahin sa Davao Region makasinati ug kasarangan hangtod kusog nga huyop sa hangin ug kasarangan ngadto sa baluron nga kadagatan nga may balud nga 2.1 hangtod 4.0 metros.
Gihimangnoan ang publiko nga magmatngon, magmonitor sa opisyal nga pahibalo, ug likayan ang pag-adto sa delikadong mga lugar ilabi na sa kabaybayonan ug kabukiran.
Photo Courtesy: DOST-PAGASA
