Nakit-an na sa mga otoridad ang patay’ng lawas sa usa ka 48-anyos nga babaye nga residente sa Purok 13, Barangay Poblacion, Valencia City, human sa ika-17 ka adlaw sa padayon nga search and retrieval operation niaging Oktobre 04, 2025.
Ang lawas nakaplagan sa may Busco Bridge, lungsod sa Quezon, Bukidnon usa sa mga lugar nga gimonitor pag-ayo sa mga rescuers sukad pa sa sinugdanan sa operasyon.
Sa eksklusibong pakighinabi sa Juander Radyo Malaybalay, kang June Ray Valero, ang hepe sa City Disaster Risk Reduction and Management Office (CDRRMO) Valencia, mikumpirma nga ang patay’ng lawas mao si Dina Consolacion, usa sa mga naanod ug gireport nga missing kaniadtong Setyembre 17, 2025
Gipadayag usab ni Valero nga aduna pa’y duha ka indibidwal nga padayon pa nilang gipangita. Pahimangno karon sa katawhan nga mag-amping ug dili magkompyansa, ilabina kadtong nanimuyo sa kilid sa suba diin kung adunay pagtaas sa tubig, kinahanglan dayon nga mobakwit aron malikayan ang peligro sa kinabuhi
via: CDRRMO Valencia City
