Gipamatud-an na usab sa Philippine Basketball Association (PBA), ang ilang hingpit nga suporta sa Gilas Pilipinas sa 2026 alang sa dagkong mga torneyo sama sa Asian Games ug FIBA World Cup Qualifiers bisan pa nga ang liga anaa sa tunga-tunga sa pagsaulog sa makasaysayanong 50th Season.
Kini maoy gipahibalo ni Commissioner Willie Marcial sa wala pa ang PBA Season 50, nga molungtad og 14 ka buwan isip pagpadayon sa ilang commitment ug partnership sa national team ubos sa Samahang Basketbol ng Pilipinas (SBP) nga gipangulohan ni kanhi Meralco Governor Al Panlilio.
Sa kinatibuk-an, ang PBA masuspenso og 40 ka adlaw sa tulo ka conference niini, ang Philippine Cup, Commissioner’s Cup ug Governors’ Cup. Matod pa ni Marcial, dili lamang sa iyang tuig ug dili lang sa sunod tuig, apan kada tuig suportahan sa PBA ang Gilas.
Ang 2025 PBA Philippine Cup, sugdan karong Domingo sa Smart Araneta Coliseum apan adunay pahuway gikan sa Nobyembre 17 hangtod sa Disyembre 4 aron tugotan si Gilas head coach Tim Cone ug Gilas nga makapangandam sa pagsugod sa FIBA World Cup Asian Qualifiers nga adunay lima ka window hangtod sa 2027 sa Qatar.
Anaa ang Gilas sa Group A sa two-round World Cup Asian Qualifiers kauban ang Australia, New Zealand ug Guam. Unang makigsangka ang Gilas sa Guam sa homecourt niini karong Nobyembre 28.
Photo Courtesy to:Metro Central
