Nakab-ot ang Guinness World Records sa Roasters, usa ka Emirati nga coffee shop sa Dubai, para sa pinakamahal nga tasa sa kape nga nagkantidad ug 2,500 dirhams (kapin-kulang P39,000).
Sa ilang flagship location, giandam ang kape gamit ang V60 method ug gisudlan sa handcrafted Edo Kiriko crystal glass. Gigamit sa maong kape ang talagsaon nga Panamanian Geisha beans nga gikan sa Hacienda La Esmeralda farm.
Ang maong kape gipalit sa Roasters sa presyo nga $604,000 (mga P35.5 milyon) sa usa ka auction. Kining Geisha beans nailhan sa ilang floral, fruity, ug citrusy notes, ug mao ang labing atraksyon sa Roasters.
Giserbisyohan kini nga kape kauban ang tiramisu ug chocolate ice cream nga aduna sab Geisha beans. Usa ka wala na panganli nga customer ang mibayad para sa maong tasa sa kape.
Sumala ni Konstantin Harbuz, CEO sa Roasters, dakong dungog ang pagkahimong Guinness Record holder ug usa kini ka pasidungog sa ilang dedikasyon.
Nagpakita usab kini sa pag-uswag sa dungog sa Dubai isip usa ka destinasyon para sa labing talagsaon nga coffee experience.
PHOTO COURTESY: GulfNews
