Nagpahamtang na usab ang Department of Energy (DOE) og 60 ka adlaw nga price freeze alang sa LPG ug kerosene sa lalawigan sa Cebu human sa kusog nga linog nga miigo sa Visayas.
Tumong niini nga inisyatibo nga masiguro nga walay mga negosyante nga magpahimolos sa presyo sa mga produktong petrolyo nga gikinahanglan sa mga residente nga apektado sa katalagman.
Samtang, gipaspasan usab sa energy sector ang pagbalik sa suplay sa kuryente sa Cebu nga grabe ang kadaot tungod sa maong linog. Giingon sa DOE nga giprioridad karon ang mga ospital, water stations, ug ubang pangunang utilities nga vital alang sa kaluwasan ug panginahanglanon sa mga lumulupyo.
Ang DOE misugo sa National Grid Corporation of the Philippines (NGCP), mga generation companies, ug electric cooperatives nga paspasan ang mga lakang sa pagpahiuli sa suplay sa kuryente. Aduna na usab nga mga technical teams aron manguha ug makatukod og alternatibong power supply para sa nag-unang establisyimento.
Gipangandaman na sab ang pag-deploy sa generator sets isip temporaryo nga back-up nga kuryente para sa mga health centers ug evacuation centers nga nag-atiman sa mga biktima.
Photo courtesy: Inquirer
