Gianunsyo bag-o lang sa mga Chinese researchers gikan sa Zhejiang University sa Hangzhou ang ilang imbensyon nga “super glue” para sa bukog, gitawag nga “Bone-02”, nga makasumpay matud pa sa mga nabali nga bukog sulod lang sa pipila ka minuto.
Ang mga bali nga kasagaran moabot ug bulan aron maayo, karon mahimong masulbad na sa mas paspas ug dili kaayo mahal nga paagi.
Sumala pa ni Lin Xianfeng, usa ka orthopedic surgeon, ang Bone-02 makadikit sa nabali nga bahin sa bukog sulod lang sa tulo ka minuto.
Gawas sa kapaspason niini, ang Bone-02 kay natural nga ma-absorb sa lawas, busa dili sama sa kasagaran nga pagtambal sa bali nga nanginahanglan ug metal plate ug turnilyo nga kinahanglan pa ug ikaduhang operasyon aron tangtangon kini.
Ang Bone-02 naparehistro na ug patent sulod ug gawas sa China. Apan, kinahanglan pa ug dugang nga clinical trials aron hingpit nga makumpirma ang kaluwasan ug pagka-epektibo niini.
Photo Courtesy to:Instagram
