Gipakusgan karon sa Iligan City Anti-Drug Abuse Council (ICADAC), kauban ang Philippine Drug Enforcement Agency (PDEA), ang ilang kampanya pinaagi sa re-orientation program alang sa mga Barangay Anti-Drug Abuse Council (BADAC).
Tumong niini nga mapalig-on pag-usab ang papel sa mga barangay sa pakigbatok sa ilegal nga droga. Sumala sa ICADAC, daghang BADAC ang wala na naglihok sa ilang mandato,hinungdan nga naluya ang kampanya sa barangay level, ug pipila ra gihapon ang nadeklarang “drug cleared” nga barangay sa Iligan.
Samtang sa laing bahin, gibutyag sa kadumalahan sa Iligan City Police Office ang ilang paningkamot sa mapakunhud ang pagkuyanap sa illegal nga droga sa syudad.
Matud ni PMAJ. Zandrex Panolong, Police Information Officer-ICPO, nga anaa na 18 ka barangay ang opisyal nga gi-deklarar sa PDEA nga “drug cleared.”
Bisan pa man sa maong kalampusan, nanawagan gihapon ang kapolisan sa mas hugot nga suporta sa katawhan.
Kini nga paningkamot usa ka pahimangno nga ang kalampusan sa usa ka drug-free nga Iligan nagsugod sa kooperasyon sa matag barangay ug komunidad.
