Patay ang usa ka 51-anyos nga lalaki human sa pagpamusil ug pagpanunggab nga nahitabo sa Purok 9A, Donhai Subdivision, Barangay Dologon, Maramag, niadtong nakalabayng gabii.
Base sa imbestigasyon, ang biktima giingon nga katapusang nakit-an samtang nag-inom sa usa ka tindahan sa maong lugar, mga alas 7:00 sa gabii, nadungog sa mga silingan nga nagsinggit-singgit kini sa gawas sa iyang balay dihang paglabay sa pipila ka minuto, duha ka buto sa armas ang milanog sa palibot.
Pasado alas 7:30 sa gabii, nakaplagan ang biktima nga nagbuy-od atubangan sa pinuy-anan ni Abner Macabodbod, diin kini naligo sa dugo ug adunay daghang samad dinunggaban sa nagkadaiyang parte sa lawas.
Ang biktima gidala pa sa Bukidnon Provincial Hospital – Maramag (BPH) alang sa hinanaling medikasyon apan gideklarar nga dead on arrival sa attending physician tungod sa hypovolemic shock nga resulta sa daghang samad.
Gikordon sa Maramag Municipal Police Station (MPS) ang crime scene ug mihangyo sa Bukidnon Provincial Forensic Unit 10 aron iproseso ang ebidensya. Padayon pa ang imbestigasyon sa kapulisan aron masuta kinsa ang responsable sa maong krimen
via: Maramag Municipal Police Station
