Patay ang 42 anyos nga babaye human gipusil sa iyang live in partner niadtong miaging adlaw sa Purok 2, Libertad, Quezon, Bukidnon.
Base sa inisyal nga imbestigasyon, nasayrang ang biktima ug ang suspetsado nga usa ka 30-anyos nga lalaki, samtang nagbiyahe sakay sa motorsiklo gikan sa public market padulong pauli mga 100 metros gikan sa ilang balay, giingong nagsugod paglalis
Matod pa sa saksi, mikanaog ang suspetsado sa motorsiklo, mibunot og armas gikan sa iyang sling bag ug gipusil ang biktima sa tuo nga bahin sa ulo lahos sa walang bahin hinungdan sa hinanaling kamatayon. Ang biktima gidala dayon sa Infirmary Rural Health Unit sa Quezon, apan gideklarar kini nga dead on arrival sa attending physician.
Human sa krimen, miikyas ang suspek ug giingong mibaktas paingon sa usa ka plantasyon sa tubo. Walay nakit-ang basiyo sa bala o laing ebidensya sa crime scene, apan padayon ang Quezon Municipal Police Station sa gihimong hot pursuit operation aron masikop ang suspetsado samtang nagpadayon usab ang mas lawom nga imbestigasyon sa insidente.
via: Quezon Municipal Police Station
