Gimonitor ni President Ferdinand Marcos Jr. kagahapong adlawa, Setyembre 21, 2025 ang mga protesta nga nagpadayon sa nagkalain-laing parte sa Pilipinas, sumala sa pamahayag sa Malacañang. Giklaro sa Palasyo nga respetado sa administrasyon ang katungod sa katawhan sa gawasnong pagprotesta, bisan pa nga ang mga isyu nga gipasang-at naglakip sa korapsyon ug ubang reklamo batok sa gobyerno.
Sumala ni Communications Undersecretary Claire Castro, personal nga gisubay sa pangulo ang kahimtang sa mga demonstrasyon pinaagi sa regular nga update gikan sa kapulisan ug lokal nga pangagamhanan.
Iyang gipahinumdom nga importante nga mapadayon ang kalinaw ug kahusay atol sa pagpadayag sa sentimyento sa mga lumulupyo.
Dugang pa, wala gipadayon ni Marcos ang iyang nakatakdang byahe sa United Nations General Assembly sa New York, aron sa pagpokus matud pa sa problema sa nasud ug sa mga reklamo nga gipadayag sa katawhan.
Gipakita niini ang pagpanguna sa lokal nga isyu kaysa internasyonal nga kalihukan. Gipasalig usab sa Palasyo nga girespeto sa administrasyon ang tawhanong katungod sa mga nagprotesta, apan nanawagan kini sa publiko nga magpabilin ang kalinaw ug likayan ang kagubot samtang gipadayag ang ilang mga mulo.
Photo for illustration credits to:Manila Standard
