Nasikop ang usa ka laborer nga taga Tagum City atol sa buy-bust operation nga gipahigayon sa kapulisan sa Asuncion niadtong nakalabay nga adlaw sa Brgy. Buclad Tagum City, Davao del Norte. Ang operasyon gipangulohan sa Asuncion Municipal Police Station Station Drug Enforcement Team (SDET), uban sa 1st DNPMFC ug PDEU, ubos sa mando ni PMAJ Collin S. Rama, Hepe sa Asuncion MPS, inubanan ang maong kalihokan pinaagi sa koordinasyon sa PDEA.
Nadakpan sa operasyon ang suspetsado nga nailhan sa alyas “Toto” usa ka laborer, nga nagpuyo sa Brgy. La Filipina, Tagum City. Nakumpiska gikan sa posisyon sa suspetsado ang duha ka heat-sealed sachet nga gituohang shabu, Php 1,000 nga tinuod nga kwarta isip buy-bust money, Php 8,000 nga boodle money, Usa ka .38 revolver nga walay serial number, ug tulo ka buhing bala, Usa ka itom nga Infinix cellphone, Usa ka itom nga pitaka, ug usa ka itom nga Tribe sling bag.
Ang nasakmit nga droga gibana-banang motimbang sa lima (5) ka gramo, nga adunay standard drug price nga Php 34,000 ka pesos. Sumala sa kapulisan, gihimo ang inventory ug pagmarka sa ebidensya sa presensya sa mga gitawag nga mandatory witnesses, subay sa balaod.
Gipahibalo usab sa kapulisan ang suspetsado bahin sa iyang katungod pinaagi sa Miranda Doctrine.
Karon, mag-atubang kini og kaso nga paglapas sa Republic Act 9165 o ang Comprehensive Dangerous Drugs Act of 2002, nga ipasaka sa korte sa probinsya sa Davao del Norte.
Photo for illustration credits to:The appeal
