Nipagawas og pasidaan ang Department of Justice, sa mga opisyal sa gobyerno ug mga kontraktor nga nalambigit sa mga anomalosong proyekto sa flood control projects.
Mismong si Secretary Jesus Crispin ‘Boying’ Remulla, ang nipahimangno kanila bahin sa ilang kalambigitan sa maong isyu sa kurapsyon. Dugang pa niini nga mahimong mag-atubang sa tibuok kinabuhi nga pagkabilanggo kon pasakaan sila og kaso.
Matod pa, nga ila usab nga gikonsiderar ang ‘forfeiture’ o pagbawi sa ilang mga kabtangan gikan sa kuwarta nga nakolekta gikan sa public fund.
Giawhag ug gipahinumdoman ni Remulla ang mga indibidwal, nga nalambigit sa pagkontak o pagsulti sa ilang nahibaw-an kalabot sa isyu sa ghost projects. Kun ugaling iuli sa mga kontraktor o opisyal sa gobyerno ang ilang nabawi nga kuwarta, gipasabot ni Justice Secretary Remulla, ipaubos gihapon kini sa makuti nga eksaminasyon.
Matod niya nga ipaubos sila sa forensics accounting aron masiguro ang kamatuoran sa ilang gideklarar nga kantidad sa kuwarta.
Samtang, positibo usab nga gipaambit sa kalihim nga adunay nadiskubrehan sa ilang imbestigasyon ang National Bureau of Investigation nga iyang gipalihok. Ang Anti-Graft Unit sa National Bureau of Investigation, mao ang grupo nga gitahasan sa Department of Justice nga motutok sa imbestigasyon may kalambigitan sa mga anomalosong flood control projects.
Naglakip kini sa daghang mga propesyonal, labi na ang mga hanas sa forensic accounting, aron magpunting sa pag-analisar sa salapi gikan sa mga ghost projects.
Tungod niini, gipaabot nga pinaagi sa ‘findings’ sa bureau, makapasaka na og tukmang kaso ang Department of Justice.
Lakip sa posibleng mapasaka nga kaso mao ang ‘plunder’ ug ‘malversation of public funds’ batok sa mga opisyal nga nakabenepisyo sa kontrobersiya.
Sa karon, wala pay gipaambit ang kalihim kon duna bay opisyal nga nisulti sa publiko aron ibalik ang kuwarta nga nakolekta gikan sa mga anomalosong ghost project sa gobyerno.
Photo courtesy: DOJ
