Patay ang duha ka managhigala human gipamusil sa wala mailhing suspetsado sa Purok-7, Barangay Vintar, Valencia City kagahapon sa alas 11 sa buntag, Setyembre 10, 2025.
Sa pakighinabi sa Juander Radyo Malaybalay, gikumpirma ni Bukidnon Provincial Police Spokesperson Major Jayvee Babaan, nga usa sa mga biktima, si Godofredo Jardinico, adunay criminal record kaniadto sa illegal nga druga, samtang ang kauban niini nga si Jeric Paskin, 45 anyos, posibleng nadamay lamang sa insidente.
Matud pa ni Babaan, dugay nang adunay hulga sa kinabuhi si Jardinico, ilabi na human siya nakalingkawas sa unang higayon sa pagpamusil kaniya sa Barangay Nabag-o, sa maong dakbayan niadtong milabay’ng tuig.
Sumala sa mga nakasaksi, nagsakay sa Hilux pick-up ang mga suspetsado ug dali silang misibat pagkahuman sa krimen.
Base sa inisyal nga imbestigasyon sa Valencia City Police Station, ang mga biktima nagsakay sa pula nga Honda Click nga motorsiklo nga adunay plate number 137KVY ug paingon unta sa lungsod sa San Fernando sa dihang kalit silang gipamusil kung asa narekober sa crime scene ang kapin 20 ka basiyo sa bala gikan sa wala pa matino nga klase sa armas.
Nasayran nga mag-bestfriend ang duha ka biktima, ug si Jeric Paskin bag-o lang nakabalik sa Valencia gikan sa Manila.
Sa pagkakaron, padayon pa ang imbestigasyon sa kapulisan pagtumbok sa suspetsado samtang gituohang personal nga pagdumot ang motibo sa krimen.
Gipahimangnoan usab sa mga otoridad ang katawhan sa pagpahibalo dayon sa bisan unsang impormasyon nga makatabang sa kaso.
via: Valencia City PNP
