Gihimo og hair accessory sa usa ka Japanese fashion brand nga JennyFax ang usa ka pares nga panty nga gilakipan og hair clip, nga nakapukaw og kusog nga diskusyon sa social media. Ang talagsaong produkto, nga gitawag og panty ribbon bow, gibaligya sa tulo ka kolor sa kantidad nga 17,600 yen (katumbas sa P6,800).
Ang JennyFax nailhan sa ilang “panty ribbon bow” nga mga disenyo ug mas napopular pa kini sa China human migawas ang mga hulagway sa maong produkto. Tungod niini, daghang netizens ang nakiglalis sa online bahin sa mga limitasyon sa pagkamamugnaon sa industriya sa fashion.
Samtang ang uban nagtan-aw niini isip usa ka maisugong pahayag sa uso, daghan usab ang nagduhaduha nga ang ordinaryong underwear mahimong ibaligya nga mahalon nga gamit sa buhok. Dili kini ang unang higayon nga adunay kontrobersyal nga produkto sa fashion industry, sama sa Balenciaga nga kasagaran gihisgutan tungod sa ilang dili naandan nga disenyo.
Ang panty ribbon bow karon nagdugang sa listahan sa mga produkto nga giisip nga “avant-garde” ug nag-abli og diskusyon sa kung unsa gyud ang pasabot sa modernong fashion.
Photo Courtesy: SPORTS CHOSUN
