𝐀𝐌𝐁𝐔𝐋𝐀𝐍𝐒𝐘𝐀 𝐒𝐀 𝐀𝐃𝐄𝐋𝐀 𝐒𝐄𝐑𝐑𝐀 𝐓𝐘 𝐌𝐄𝐌𝐎𝐑𝐈𝐀𝐋 𝐌𝐄𝐃𝐈𝐂𝐀𝐋 𝐂𝐄𝐍𝐓𝐄𝐑, 𝐍𝐀𝐃𝐈𝐒𝐆𝐑𝐀𝐒𝐘𝐀 𝐒𝐀𝐌𝐓𝐀𝐍𝐆 𝐍𝐀𝐆𝐓𝐑𝐀𝐍𝐒𝐏𝐎𝐑𝐓 𝐎𝐆 𝐂𝐎𝐌𝐀𝐓𝐎𝐒𝐄 𝐍𝐆𝐀 𝐏𝐀𝐒𝐘𝐄𝐍𝐓𝐄

Nadisgrasya ang usa ka ambulansya sa Adela Serra Ty Memorial Medical Center (ASTMMC) nga naghatud og comatose nga pasyente paingon sa Davao Regional Medical Center (DRMC) sa Mawab, Davao de Oro, pasado ala-1:00 sa hapon, niadtong nakalabay nga adlaw.

Sumala sa report, lima ang sakay sa ambulansya: ang drayber, usa ka transport nurse, usa ka respiratory therapist, ang pasyente, ug usa ka watcher. Nasiguro nga walay grabe nga samad ang tanan ug dayon silang gidala sa DRMC alang sa dugang medikal nga atensiyon.

Gipasabot sa ASTMMC nga gawas sa ambulansya ug mga pasahero niini, wala nay laing indibidwal o kabtangan ang naapektuhan sa insidente.

Una nang mitabang ang Mawab Municipal Disaster Risk Reduction and Management Office (MDRRMO) sa dapit sa aksidente. Base sa inisyal nga report, nga niadtong higayona, nakasinati og ulan nga panahon diin naghatag kini og lisod nga kondisyon sa karsada.

Padayun pa usab ang imbestigasyon kung unsay hinungdan sa maong aksidente samtang naghulat sa opisyal nga report gikan sa Philippine National Police (PNP) ug sa rescue team.

Nag-koordinar na usab ang ASTMMC uban sa MDRRMO ug DRMC aron masiguro ang husto nga pag-atiman sa mga apektado. Usa ka representante gikan sa ospital sa ASTMMC ang gimanduan sa Medical Center Chief nga motutok ug personal nga motabang sa sitwasyon.

Photo credit to MDRRMO Mawab