Kasong homicide ang giatubang karon sa usa ka senior citizen kinsa suspetsado pagtigbas-patay sa usa ka lalaki niadtong nakalabay nga adlaw didto sa Purok 6, Sitio Malilong, Barangay Zamboanguita, Malaybalay City.
Giila ang biktima si Eduardo Montero Fernando, 45 anyos, residente sa lugar, samtang ang suspetsado naila sa alyas nga Antonio, 68 anyos, nga residente usab sa maong barangay.
Gibutyag sa pakighinabi sa Juander Radyo Malaybalay kang PMAJ Javee Babaan, spokesperson sa Bukidnon Police Provincial Office, nga anaa na sa kustodiya sa Malaybalay City Police Station ang suspetsado ug nag atubang na kini og tukmang kaso.
Base sa imbestigasyon, nagkabikil ang duha samtang nag-inom nga misangpot sa pagpanigbas sa biktima sa nawong ug li-og gamit ang sanggot panglampas hinungdan sa hinanaling kamatayon.
Dugang pa ni PMAJ Babaan, bisan og dili mopasaka ug kaso ang pamilya o tagtungod sa biktima tungod sa posibilidad sa amicable settlement manubag gihapon ang suspetsado tungod kay ang kapulisan na mismo maoy mopasaka og kaso alang sa dokumentasyon ug hustong disposisyon niini
Pahimangno karon sa kapulisan, nga kung mag-inom, likayan gayud ang pagpangitag away, mas maayo nga sa balay na lang kini buhaton ang pag-inom aron malikayan ang susamang panghitabo.
Samtang giklaro sa ig-agaw sa biktima nga suod nga maghigala ang duha sukad miabot sa maong lugar human mihawa sa ilang gipuy-an didto sa Cebole Quezon tungod sa iyang special nga anak.
Sa pagkakaron anaa sa pag-atiman ni alyas Inday ang anak sa biktima ug gikatakdang ibalik sa pamilya didto sa Cebole Quezon.
Photo courtesy to : ANTONIO TONGCOGO
