Walay undang ang gihimong pagpangita sa mga otoridad sa mga natabunan sa nangahugno nga mga building ug balay human mitay-og ang magnitude 6 nga linog sa Afghanistan.
Daghang mga biktimang samdan ang gidala na sa mga tambalanan. Nanawagan na ang United Nations High Commissioner for Refugees (UNHCR) sa mga nasud nga magpadala dayon og tabang.
Nagpadala na usab og mga personahe ang Islamic Relief gikan sa United Kingdom aron motabang sa pagpangita sa mga nawala tungod sa linog.
Wala pa matino sa International Federation of the Red Cross ug Red Crescent Societies (IFRC) kung pila ang katibuk-ang damyos nga dala sa maong linog sa Eastern Afghanistan.
Dakong hagit usab alang sa mga rescuers ang pag-abot sa kagabhion ug ang padayong aftershocks nga nasinati sa maong lugar. Nagpadala na usab og ayuda ang UN World Food Programme (WFP) alang sa mga biktima sa linog.
Gilauman sa mga otoridad nga mosaka pa ang ihap sa mga namatay nga sa inisyal nga datos kapin na sa 800, samtang halos 3,000 ang samdan. Nag-apod apod usab ang Afghan government og $1.46 milyon isip tabang alang sa tanang naluwas sa linog.
photo courtesy to: al jazeera
