Gidawat ni Presidente Ferdinand Marcos Jr. ang pagresign sa pwesto ni Department of Public Works and Highways (DPWH) Secretary Manuel Bonoan human sa kontrobersiya sa mga proyekto sa flood control. Gipahibalo kini nga desisyon sa Palasyo pinaagi sa Presidential Communications Office nga nagkanayon nga si Bonoan mipakita og suporta sa panawagan sa Presidente alang sa accountability, transparency ug reporma sa ahensya.
Gipuli si Department of Transportation Secretary Vince Dizon isip bag-ong acting secretary sa DPWH. Gihatagan siya og tahas sa pagpanguna sa anti-corruption drive ug paghimo og full organizational sweep sa ahensya aron masiguro nga ang pondo sa gobyerno magamit lamang alang sa mga estrukturang makaprotekta ug makabenepisyo sa katawhan.
Sa laing bahin, gitudlo usab si Atty. Giovanni Lopez isip acting secretary sa DOTr. Gitukod usab ni Marcos ang usa ka Independent Commission to Investigate Flood Control Anomalies. Ang tumong niini mao ang pagsusi sa tanang proyekto, pagtan-aw sa mga iregularidad, ug pagrekomenda og mga lakang sa accountability.
Gidayeg sa pipila ka mga senador ang pagtudlo kang Dizon sa DPWH. Matod nila nga dako ug lisod ang hagit nga atubangon apan aduna kini oportunidad sa pagpanguna sa dugay nang gikinahanglan nga reporma sa ahensya. Samtang ang pipila ka mga mambabalaod nagpadayag nga ang pag-ilis sa liderato usa lamang ka inisyal nga lakang aron hingpit nga maputol ang sistema sa korapsyon sa DPWH.
Photo courtesy to:DPWH
