Gikatakdang tugutan ang mga benepisyaryo sa Pantawid Pamilyang Pilipino Program (4Ps) nga magpabilin sa programa bisan molapas sa kasamtangang 7-ka-tuig nga limitasyon, kung maamyendahan ang balaod nga nagatukod niini.
Sa usa ka post-SONA discussion, gibutyag ni Department of Social Welfare and Development (DSWD) Secretary Rex Gatchalian nga ang panawagan ni Presidente Ferdinand Marcos Jr. sa iyang ikaupat nga State of the Nation Address (SONA) magahatag og lig-on nga basehan aron palungtaron ang partisipasyon sa mga benepisyaryo sa programa, hangtod kini gikinahanglan.
Apan giklaro ni Gatchalian nga ang dugay nga pagpabilin sa mga benepisyaryo magadepende gihapon sa ilang kahimtang sa kinabuhi. Kung makab-ot na nila ang kalig-on ug kabahin sa ilang katuyuan ang pagbarog sa kaugalingon, sila gilauman nga mograduate gikan sa programa.
Sukad sa tuig 2022, gitaho sa DSWD nga kapin sa 1.4 milyong Pilipino na ang opisyal nga nakagradwar sa 4Ps, usa ka ilhanan sa kalampusan sa maong programa sa pagtabang nga makab-ot ang panginabuhing malungtaron.
photo credits:pna.gov.ph
