Gisuportahan karon ni Deputy Minority Leader ug La Union Representative Paolo Ortega ang pagbawal sa online o electronic nga sugal sa nasud. Gitataw sa kongresista nga daghang kaso ang nagpakita nga dili maayo ang maong matang sa sugal alang sa mga pamilyang Pilipino.
Nangatarungan ang magbabalaod nga bisan og walay kuwarta ang ubang mga magdudula sa online gambling, makapusta ug makasugal gihapon sila pinaagi sa tabang sa mga serbisyo sa e-wallet diin makahulam dayon sila og kuwarta sa ilang mga kaila.
Gitumbok sa kongresista ang naunang epekto sa e-sabong sa panahon sa pandemya, diin daghang mga Pilipino ang naka utang o nalubong sa utang. Gihatagan og gibug-aton sa opisyal nga kinahanglang tun-an ang sugyot sa pagdili o pag-restrict niini tungod kay gawas sa epekto niini sa mga pamilyang Pilipino, matud niya nga makaapekto usab kini sa mga trabahante nga nagtrabaho ubos sa nahisgutang sektor.
Sa katapusan, siya miingon nga ang pagbawal sa online ug electronic gaming mas maayo kung ang yano nga regulasyon dili makasulbad sa problema sa maong sugal. Sa 20th Congress, daghang mga magbabalaod ang nagpakita og suporta alang sa mas estrikto nga regulasyon sa e-gaming.
