Gipakita sa People’s Administration ang padayon nga pagpalig-on sa sektor sa edukasyon human giaprobahan sa City School Board (CSB) ang 2027 Special Education Fund (SEF) Budget atol sa ilang 9th CSB Meeting niadtong Nobyembre 17, 2026. Gipangulohan ang maong tigom ni Mayor Joel Mayo Almario uban sa Department of Education (DepEd) Mati aron masiguro ang dugang nga suporta alang sa mga eskwelahan ug mga estudyante sa dakbayan.
Pinaagi sa giaprobahang pondo, matubag ang panginahanglan sa dugang sweldo sa Local School Board (LSB) teachers ug mga kawani sa eskwelahan, pagpaayo sa mga pasilidad, ug pagpatuman sa nagkadaiyang programa nga makatabang sa pagpalambo sa kalidad sa edukasyon. Tumong niini nga mahatagan og mas maayong kahigayonan ang mga magtutudlo ug mga estudyante sa pagkat-on ug pagtudlo.
Lakip usab sa prayoridad sa 2027 SEF Budget ang Alternative Learning System (ALS), Learners with Disabilities, National Feeding Program, ug ang pag-apil sa mga estudyanteng Matinian sa nagkadaiyang kompetisyon sulod ug gawas sa dakbayan.
Pinaagi niini, padayon nga gipakita sa lokal nga pangagamhanan ang ilang pasalig nga walay estudyanteng mabiyaan ug mas mapalig-on ang kaugmaon sa kabatan-onan pinaagi sa edukasyon.
Photo courtesy: LGU Mati










