Nasikop sa mga operatiba sa Los Amigos Police Station ang duha ka tawo atol sa buy-bust operation nga gilusad alas dos sa kaadlawon niadtong Nobyembre 17, 2026, sa Purok 5-A, Barangay Los Amigos, Tugbok District, Davao City.
Giila ang mga dinakpan sa mga alyas nga “MER” ug “JOY,” nga live-in partner sa usag usa. Nakuha kang “MER” ang usa ka sachet nga gituohang adunay shabu human kini giingong nadakpan sa pagbaligya, samtang nasakmit gikan kang “JOY” ang marked money nga gigamit sa operasyon.
Gipangulohan ni PMAJ Roel C. Ibañez, Acting Station Commander, ang operasyon uban sa Station Drug Enforcement Team. Gipadala na sa Regional Forensic Unit 11 ang mga nakuhang ebidensya alang sa laboratory examination.
Nag-atubang ang duha ka suspek og posibleng kasong paglapas sa Sections 5 ug 11 sa Republic Act 9165 kun Comprehensive Dangerous Drugs Act of 2002. Gipasalig sa kapulisan nga magpadayon ang ilang mga operasyon aron mapugngan ang pagbaligya ug pagkatag sa ilegal nga droga sa komunidad.
Photo courtesy: DCPO










