Balhog sa prisohan ang usa ka lalaki human makuhaan og siyam ka sachet sa gituohang shabu atol sa buy-bust operation sa Morales Extension, Barangay City Heights, General Santos City, niadtong nakalabay nga adlaw.
Giila ang suspek nga si alyas Ceazar, hamtong ang pangidaron ug residente sa nasampit nga lugar. Narekober gikan kaniya ang siyam ka sachet sa gituohang shabu nga may gibana-banang gibug-aton nga 26.4 gramos ug gibanabanang kantidad nga ₱179,520.
Nakuha usab sa operasyon ang ₱1,000 nga buy-bust money, ₱550 nga cash ug uban pang mga ebidensiya. Gipahigayon ang operasyon sa mga personahe sa CPDEU, CIU ug Police Station 4 sa General Santos City Police Office.
Ang suspek gidala sa kustodiya sa kapulisan ug posibleng mag atubang sa kasong paglapas sa RA9165 Article II Section 5 ug 11 o Comprehensive Dangerous Drugs Act of 2002.
