Patay dihadiha ang usa ka 32-anyos nga drayber sa motorsiklo human nabangaan sa usa ka Toyota Hilux nga misulod sa pikas lane sa Amai Pakpak Road, Purok 31, Zone 13, Pensioner Village, Barangay Maria Cristina, Iligan City, sa may alas 7:30 sa gabii niadtong Nobyembre 8, 2026.
Subay sa report sa kapulisan, nagbiyahe paingon sa sidlakang bahin sa dalan ang Toyota Hilux nga gimaneho sa wala pa mailhing drayber, samtang nisaka kini sa Amai Pakpak Road.
Nasayran nga sa pag-abot niini sa mismong lugar, kalit kining misimang ug misulod sa pikas lane, hinungdan nga nabangga niini ang atubangang bahin sa Yamaha Aerox nga gimaneho sa 32-anyos, lalaki, ug residente sa Purok 23, Barangay Acmac, sakop ning syudad nga nagbiyahe sa kasukwahi nga direksiyon.
Tungod sa kusog nga impact, nasamad ang ulo sa drayber sa motor ug gideklarang patay sa mga personahe sa ambulansiya nga miresponde sa lugar. Human sa pagkabangga, daling nisibat ang drayber sa Toyota Hilux ug gibiyaan niini ang iyang sakyanan.
Sa pagkakaron, ang sakyanan ug motor gidala sa Traffic Enforcement Unit (TEU) alang sa hustong disposisyon.
Nagpadayon ang kapulisan sa paglusad sa hot pursuit operation aron mailhan ug madakpan ang drayber sa sakyanan nga mikalagiw human sa aksidente.
Photo Courtesy: ICPO
