Nagpahayag og suporta ang People’s Administration sa orientation nga gipahigayon sa Davao Inventors Association, Inc. (DIAI) sa Sambuokan Hall aron giyahan ang mga lokal nga imbentor, researchers ug estudyante sa pagpalambo sa ilang kahanas ug sa pagtukod sa City of Mati Inventors and Innovators Council. Tumong niini nga mahatagan og dugang oportunidad ang mga lokal nga talento sa natad sa imbensyon ug inobasyon.
Pinaagi sa maong inisyatiba, gilauman nga mapalig-on ang networking ug kolaborasyon tali sa mga eskwelahan, imbentor ug nagkalain-laing stakeholders aron masuportahan ang mga lokal nga imbensyon, research ug community development. Makatabang usab kini sa pagpalambo sa mga bag-ong ideya nga mahimong mapuslanon sa katawhan ug sa dakbayan.
Samtang, atol sa iyang pagtambong sa session sa Sangguniang Panlungsod, giawhag ni DIAI President Ervin Carlo A. Alcano ang lokal nga panggamhanan nga opisyal nga tukoron ug pondohan ang maong konseho.
Pinaagi niini, mas mapalapad ang suporta sa mga lokal nga imbentor ug mapauswag ang mga inobasyon nga makatampo sa kalamboan sa Dakbayan sa Mati.
Photo courtesy: LGU Mati
