Pormal nang gitunol sa People’s Administration ngadto sa Schools Division Office (SDO) Mati ang 72 ka metal detectors alang sa tanang pampublikong eskwelahan sa dakbayan atol sa 4th Regional MANCOM Meeting sa DepEd XI.
Gipangulohan ni Mayor Joel Mayo Almario ang maong turnover isip kabahin sa lakang sa lokal nga panggamhanan aron mapalig-on ang seguridad sa mga eskwelahan.
Dugang niini, magpahimutang ang lokal nga panggamhanan og duha ka dugang nga watchmen sa matag eskwelahan aron mas mapalig-on ang pagbantay ug masiguro ang kaluwasan sa mga estudyante, magtutudlo ug uban pang personnel. Gilauman nga makatabang kini sa paglikay sa posibleng mga insidente sulod sa mga pasilidad sa eskwelahan.
Dugang pa, ipailalom usab sa LGU ang mga personnel sa eskwelahan sa Incident Management System Training aron maandam sila sa hustong pagtubag panahon sa mga kalamidad, emerhensiya ug krisis. Kabahin kini sa padayong paningkamot sa lokal nga panggamhanan sa pagpalambo sa mas luwas ug andam nga palibot alang sa edukasyon.
Photo courtesy: LGU Mati
