Nadakpan sa gipahigayong buy-bust operation sa kapulisan ang usa ka hamtong nga lalaki pasado alas 9:20 sa gabii niadtong Nobyembre 4, 2026, sa Purok Neptune, Barangay San Antonio, lungsod sa Titay, Zamboanga Sibugay.
Ang nadakpan usa ka bag-ong nailhang drug personality nga giila sa kapulisan pinaagi sa alyas nga SLI, nga giingong nagbaligya og ilegal nga droga ug residente sa Barangay Kitabog, Titay. Narekober gikan kaniya ang upat ka gagmayng heat-sealed plastic sachet nga adunay puti nga kristal nga substansiya nga gituohang shabu, nga adunay gibana-banang gibug-aton nga usa ka gramo ug standard drug price nga mokabat sa ₱6,800.00. Nakumpiska usab ang usa ka kaha sa sigarilyong Winston nga gigamit nga sudlanan, lighter ug ₱500 nga marked money.
Gipahigayon ang imbentaryo sa mga nakumpiskang ebidensiya atubangan sa Barangay Chairman sa San Antonio ug usa ka representante sa media. Gidala ang suspetsado sa Titay Municipal Police Station alang sa hustong disposisyon, samtang ang mga nakumpiskang droga ipadala sa Zamboanga Sibugay Provincial Forensic Unit alang sa eksaminasyon.
