Nagpahigayon og Special Recruitment Activity ang Public Employment Service Office o PESO sa lokal nga panggamhanan sa Ipil, niadtong nakalabay nga adlaw nga gihimo sa Mayor’s Conference Room sa Taway, Ipil, Zamboanga Sibugay.
Gipangunahan ang maong recruitment activity sa Joseline International Manpower Corporation alang sa mga bakanteng trabaho sa gawas sa nasud, partikular sa Saudi Arabia, United Arab Emirates, Greece ug East Timor. Gitumong niini nga mahatagan og dugang oportunidad ang mga lokal nga jobseeker nga nangandoy nga makatrabaho sa laing nasud.
Giawhag ang mga interesado nga aplikante nga magdala sa ilang updated resume, mga sertipiko kon aduna, ug passport kon gikinahanglan isip kabahin sa mga dokumento sa pag-aplay.
Gipatin-aw usab nga manpower pooling lamang ang maong kalihokan ug gipahimangnoan ang mga aplikante nga magmatngon batok sa mga ilegal nga recruiter. Giawhag sila nga siguruhong lehitimo ang recruitment agency ug ang proseso sa pagpangita og trabaho sa dili pa mosugot o mohatag og bayad.
Pinaagi sa maong programa, nagpadayon ang paningkamot sa PESO-LGU Ipil sa paghatag og impormasyon ug oportunidad sa mga residente nga nangita og trabaho, ilabi na niadtong nagtinguha nga makapangita og panginabuhian sa gawas sa nasud.
