Andam na ang Cebu South Bus Terminal ug Cebu North Bus Terminal sa pagdawat sa daghang pasahero nga mobiyahe pauli sa ilang tagsa-tagsa ka probinsya alang sa pag-obserbar sa Kalag-Kalag 2026. Matod ni Ahmed Cuizon, manager sa Cebu Bus Terminals, nga naghimo na sila og nagkalainlaing kalamboan ug pagpangandam sa mga terminal aron masiguro ang kaharuhay ug kaluwasan sa mga pasahero atol sa Undas.
Lakip sa mga gipangandam mao ang pagdugang og mga electric fan ug cooler aron dili kaayo init ang palibot, ingon man ang pagbutang og mga tolda. Gihatagan usab og libreng Wi-Fi ug mainom nga tubig ang mga pasahero samtang naghulat sa ilang mga sakyanan.
Dugang pa niini, adunay klinika sulod sa terminal nga adunay doktor ug nars nga andam motabang sa mga pasaherong magkinahanglan og medikal nga pagtagad o makasinati og emerhensiya.
Pinaagi sa maong mga pagpangandam, gilauman nga mahimong mas hapsay ug komportable ang pagbiyahe sa mga molarga pauli sa ilang mga probinsya aron makig-uban sa ilang pamilya sa paghinumdom sa mga minahal nga nangamatay atol sa Kalag-Kalag 2026.
