Samdan ang usa ka 30-anyos nga lalaki human kini gitigbas sa iyang kaugalingong manghod gamit ang sundang samtang nagkaon sa ilang balay sa Purok Camote, Barangay Ilaya, lungsod sa Ronda.
Ang biktima giila lang sa alyas Nilo, samtang ang giingong mitigbas kaniya mao ang iyang manghod nga si alyas Dan, 22 anyos, usa ka laborer. Ang duha lumulupyo sa maong barangay.
Base sa inisyal nga imbestigasyon sa Ronda Municipal Police Station, nagkalalis na ang managsoon niadtong Domingo, Oktubre 25. Gituohang nakainom ang manghod sa dihang kalit kini misulod sa balay ug makadaghang higayon nga gitigbas ang iyang maguwang gamit ang sundang.
Nakaangkon og mga samad sa nagkalainlaing bahin sa lawas ang biktima tungod sa pagpangulata gamit ang hait nga armas. Dali kining gidala sa Barili District Hospital aron mahatagan og medikal nga pagtagad.
Samtang, gidala sa kapolisan ang suspetsado ug ang sundang nga giingong gigamit sa krimen ngadto sa police station alang sa tukmang dokumentasyon ug kustodiya samtang gipadayon ang pagproseso sa kaso.
Photo Courtesy: Decemay Padilla
