Nadakpan sa kapulisan ang 12 ka wanted persons sa nagkadaiyang operasyon sa Surigao del Norte atol sa gilusad nga OPLAN SACLEO. Sumala ni PCOL Warren Dablo, Provincial Director sa Surigao del Norte Police Provincial Office o SDNPPO, ang maong kampanya batok sa malapason sa balaod pinasubay sa koordinasyon sa nagkadaiyang police units sa probinsya aron madakpan ang mga indibidwal nga adunay warrant of arrest.
Lakip sa mga nadakpan ang 39-anyos nga lalaki nga mag-uuma, residente sa Barangay Camp Edward, Alegria, nga giatubang ang kaso kalabot sa paglapas sa Section 77 sa Presidential Decree 705 o Revised Forestry Code of the Philippines, diin adunay P30 mil pesos nga piyansa alang sa iyang temporaryong kagawasan.
Nadakpan usab ang duha ka lalaki, nga parehong taga-Alegria, tungod sa kasong pagpangawat sa mineral nga gilatid sa Section 103 sa Republic Act 7942 o Philippine Mining Act of 1995. Unom usab ka babaye gikan sa lungsod sa San Isidro, Siargao Island, ang gidakop tungod sa giingong paglapas sa Presidential Decree 1602 o Anti-Gambling Law.
Samtang nadakpan usab ang 34-anyos nga babaye nga taga-Barangay Cahulogan, Gingoog City, tungod sa kasong paglapas sa Section 5(1) sa Republic Act 9262 o Anti-Violence Against Women and Their Children Act, nga adunay piyansang P72 mil pesos.
Usa usab ka 47-anyos nga drayber og traysikol, residente sa Sitio Cayutan, Barangay Cagniog, Surigao City, ang gidakop tungod sa paglapas sa Section 10(A) sa Republic Act 7610.
Lain pang 55-anyos nga mag-uuma, minyo gikan sa Barangay Paco, Mainit, nga giatubang ang kasong reckless imprudence resulting in less serious physical injuries, nga adunay gitugot ga piyansa nga duha ka libo ka pesos.
Gipadayag ni PCOL Warren E. Dablo nga nagpakita ang maong mga operasyon sa padayong paningkamot sa kapulisan sa pagpalig-on sa koordinasyon sa nagkadaiyang police units, pagpatuman sa balaod ug pagdala sa mga wanted nga indibidwal aron atubangan ang korte.
