Gipahigayon sa lokal nga panggamhanan sa Libona, Bukidnon ang usa ka public hearing alang sa unom ka gisugyot nga ordinansa niadtong nakalabay nga adlaw, didto sa New Municipal Conference Hall.
Gipangunahan ang maong kalihokan sa Opisina sa Sangguniang Bayan sa pagpangulo ni Municipal Vice Mayor Noel “Tawing” B. Woo uban sa mga miyembro sa konseho, diin tumong niini nga madungog ang mga opinyon ug sugyot sa katawhan sa dili pa pormal nga aprobahan ang mga gisugyot nga lokal nga balaodnon.
Lakip sa mga importanteng ordinansa nga gihisgutan mao ang tabang pang-edukasyon para sa mga anak sa kabos nga mag-uuma, accident insurance alang sa mga mag-uuma, mangingisda, ug farmworkers, ingon man ang tabang sa kolehiyo alang sa mga kwalipikadong katutubo o lumad. Gidugang usab sa diskusyon ang probisyon alang sa mental health care program, ang pag-regulate sa sobra nga kasaba, ug ang pagdili sa dili angay nga pagpakita sa lawas sa mga pampublikong lugar. Bisan pa sa dili maayong panahon, nagpasalamat ang konseho sa mga residente, opisyal sa barangay, ug mga representante sa ahensiya nga nitambong ug nipadayag sa ilang suporta ug rekomendasyon alang sa maong mga polisiya sa komunidad.
Photo courtesy: LGU –Libona
