Dakpan ang 8 ka Chinese National ug18 ka indibidwal human sa hiniusang operasyon sa kapulisan ug nagkadaiyang ahensya sa gobyerno batok sa gituohang ilegal nga pagmina sa Barangay Mabini, dakbayan sa Surigao.
Gikasa ang operasyon sa Regional Intelligence Division 13 o RID13, kauban ang Regional Intelligence Unit 13, DENR, Mines and Geosciences Bureau o MGB Caraga, PENRO Surigao del Norte, Regional Mobile Force Battalion 13, Philippine Air Force ug mga yunit sa kapulisan sa Surigao del Norte.
Nasakmit sa operasyon ang nagkadaiyang kagamitan sa ilegal nga pagmina, lakip ang walo ka dump truck, lima ka payloader, 15 ka truck excavator, walo ka generator set, mga sluice machine, 80 ka kilo nga ore sample, usa ka Toyota Hilux pick-up truck, mga compressor, diesel fuel ug uban pang kagamitan.
Narekober usab ang duha ka improvised airgun, usa ka Armscor shotgun ug 12 ka bala sa shotgun. Base sa inisyal nga imbentaryo, mokabat sa P153,343,000 ang gibanabanang kantidad sa mga nasakmit sa illegal nga mina.
Gidala na sa Surigao City Police Station ang mga nadakpan alang sa dokumentasyon ug hustong disposisyon, samtang ang mga nasakmit nga makinarya ug kagamitan gipailalom sa kustodiya sa MGB Regional Office 13.
Padayon pang susihon sa mga otoridad ang maong kalihokan ug ang responsibilidad sa mga nadakpan kalabot sa gituohang ilegal nga pagmina.
Gitakdang kasohan ang mga suspek sa paglapas sa Section 102 and Section 103 of Republic Act No. 7942 Ang Philippine Mining Act of 1995.
