Gitudloan sa mga balaod nga nanalipod sa kababayen-an ug kabataan ang labing menos 50 ka pedicab driver sa San Carlos City atol sa orientation sa City Auditorium niadtong Oktubre 15, 2026.
Mitambong ang mga miyembro sa REPODA ug San Carlos City Terminal Pedicab Drivers Association. Gihisgotan ni SCCCAWAI President Ma. Consuelo Janice Carmona ang mga balaod batok sa pagpang-abuso, sexual harassment, human trafficking, ug online exploitation sa mga bata.
Giawhag ni SP Committee on Women and Family Chair Victoriana Cabili ang mga drayber nga ipaambit ang ilang nakat-onan sa mga pasahero ug kaubang drayber aron mas daghan ang masayod sa ilang mga katungod ug proteksiyon.
Gihatagan ang mga partisipante og sertipiko ug duha ka kilo nga bugas matag usa, gikan kang Negros Occidental 1st District Representative Julio A. Ledesma IV.
Photo courtesy: San Carlos City, Neg. Occ. -LGU Information Page
